ပြန်ပြောင်းအောက်မေ့ခြင်း 1992

“ငါ အလုပ်ထွက်လိုက်ပြီ”

အဖေ့ရဲ့ စကားသံအဆုံး ပျက်ယွင်းသွားတဲ့ အမေ့ရဲ့ မျက်နှာက ပြိုတော့မဲ့မိုးလို။ မငိုနဲ့နော် အမေ ။ ရင်ထဲက တိုးတိုးလေးအားပေးသံကို အမေ ကြားသွားတယ်ထင်ပါရဲ့။ အဖေ့ကို “ဌာနမှုးကို တင်လိုက်ပြီလား” လို့ တစ်ခွန်းတည်းမေးတယ်။ အဖေ ခေါင်းညိမ့်ပြတော့ အမေ ဘာမှဆက်မပြောတော့ပဲ အိမ်ခန်းထဲဝင်သွားတယ်။ အဲ့ဒီည ဘာရယ်လို့ မဟုတ်ပေမဲ့ (ကိုးတန်းတက်ရတော့မဲ့ ကျွန်မရဲ့ရှေ့ရေးအတွက်) အမေ စိတ်ပူနေတော့မယ်၊ ပြီးတော့ နောက်ဆက်တွဲ ပြဿနာတွေ လာတော့မယ်ဆိုတာ ကျွန်မ အလိုလိုသိနေတယ်။

နောက်ရက်တွေမှာ တိုးတိုးတမျိုး၊ ကျယ်ကျယ်တမျိုး နေ့စဉ်ရက်ဆက်လို အဖေနဲ့ အမေရဲ့ ရန်ပွဲ ပြင်းထန်လာတယ်။ လကုန်ရင် အရင်လို အဖေ့ဝင်ငွေမရှိတော့တဲ့ အမေဟာ သူ့လစာကို (ကျွန်မနဲ့ ညီမလေးရဲ့ ကျူရှင်လခ၊ ကျောင်းက အထွေထွေကုန်ကျစရိတ်၊ အိမ်စရိတ်နဲ့ တခြား အသေးသုံးတွေ) ခွဲခြမ်းစိတ်ဖြာရလို့ ထင်ပါရဲ့။ အမေဟာ ကျွန်မရဲ့ ကိုးတန်းစာသင်နှစ် တစ်နှစ်အတွင်း တော်တော်ကျသွားတယ်။

ကျွန်မ ဆယ်တန်းရောက်တဲ့နှစ်မှာတော့ အဖေနဲ့အမေဟာ တစ်ယောက်နဲ့တစ်ယောက် မျက်နှာချင်းဆိုင်ဆုံတွေ့မှုနည်းသထက်နည်းလာ သလို အသံတိတ်တိုက်ပွဲတွေလဲ ပိုပြင်းထန်လာတယ်။ တညနေ ကျွန်မ ကျူရှင်မရှိလို့ လမ်းတ၀က်ကလှည့်ပြန်အလာ၊ အိမ်အ၀င်နေရာ အရောက် အဖေနဲ့ အမေရဲ့ စကားပြောသံ အမှတ်တမဲ့ ကြားလိုက်ရတယ်။

“အခုတော့ ဘာမှမဖြစ်သလိုနေကြတာပေါ့။ သမီးကြီး ဆယ်တန်းဖြေပြီးတဲ့အထိ စောင့်ပါ။ သူက စာသိပ်တော်တယ်။ အမှတ်ကောင်း ကောင်းနဲ့ လိုင်းကောင်းကောင်းဝင်လိမ့်မယ်ဆိုတာ ကျွန်မသိတယ်။ သူ ဆယ်တန်းဖြေပြီးမှပဲ ရှင် အိမ်ကထွက်သွားချင်တယ်ဆိုရင် သွားပါ။ သွားပြီးရင်လဲ ပြန်မလာနဲ့တော့။ ဒီနေ့ကစပြီး ကွဲမယ်၊ကွာမယ်ဆိုတဲ့ စကား ကလေးရှေ့မှာ တစ်ခွန်းမှ မဟမိအောင်နေပါ” ......

မျက်ရည်တွေ ပါးပြင်ပေါ်ကို အတားအဆီးမရှိ ကျဆင်းလာတယ်။ တရားခံက ဘယ်သူမှန်းမသိ။ ဘယ်သူမှမမှားခဲ့သလို ဘယ်သူမှလဲ မမှန်ခဲ့။ ဟန်ဆောင်ကောင်းတဲ့ အဖေနဲ့အမေဟာ နောက်ရက်တွေမှာ ဘာမှမဖြစ်သလိုနဲ့ ကျွန်မစာကျက်နေရင် အမေက ကော်ဖီနဲ့ ကျွန်မ သိပ်ကြိုက်တဲ့ လက်ဖက်သုတ်ပန်းကန်လေးလာချပေးပြီး မနက်အလုပ်စောစောဆင်းရမှာမို့လို့ ည (၁၂)နာရီအထိ စာကျက်တဲ့ ကျွန်မကို ဆက်စောင့်ဖို့ အဖေ့ကို တာဝန်ပေးသွားတယ်။ အဲ့ဒီ အချိန်မှာ အဖေက ပုတီးစိတ်ပြီး သမီးကို ထိုင်စောင့်ခဲ့တဲ့ တာဝန်ကို မပျက်မကွက် ထမ်းဆောင်ခဲ့တာ အတန်းတင်စာမေးပွဲကြီးရဲ့ နောက်ဆုံးရက်အထိပဲ။

စာမေးပွဲပြီးသွားတော့ သူတို့နှစ်ယောက်ရဲ့အခြေအနေကို ကျွန်မ မသိမသာစောင့်ကြည့်တယ်။ အောင်စာရင်းထွက်တဲ့အထိ စောင့်ပြီး ကျွန်မ result ဘယ်လိုရှိလဲဆိုတာ သိချင်လို့လားတော့ မသိဘူး။ အဖေ အိမ်က ထွက်မသွားသေးဘူး။ အဲ့ဒီရက်တွေမှာ စားရတဲ့ဟင်းက လက်ဖက်သုတ်၊ ကန်စွန်းရွက်ကြော်၊ ငါးပိချက် ..အဲ့ဒီသံသရာထဲမှာ တ၀ဲလည်လည်ဖြစ်နေခဲ့ပေမဲ့ အဖေ့လက်ရာဖြစ်နေတာတကြောင်း၊ ဘယ်လိုပဲဖြစ်ဖြစ် အဖေအိမ်မှာရှိနေသေးတာတကြောင်း..အကြောင်းကြောင်းကြောင့် ကျွန်မ အဲ့ဒီဟင်းလျာတွေကို မရိုးခဲ့တာဒီနေ့အထိပဲ။

အောင်စာရင်းထွက်ပြီ။ လေးဘာသာ ဂုဏ်ထူးမှန်းခဲ့တဲ့ ကျွန်မ နှစ်ဘာသာပဲပါတော့ ရပ်ကွက်ထဲမှာ အဖေနဲ့ အမေ မျက်နှာပန်းမလှ။ အမှတ်စာရင်းထွက်လာတော့မှ မြို့နယ်ကျောင်းမှာ အမှတ်အများဆုံးနဲ့ အင်ဂျင်နီယာလိုင်းရခဲ့လို့ တော်သေးတယ်။

အဲ့ဒီမှာတင် ဇာတ်လမ်းစပြန်တယ်။ Civil Engineer တစ်ယောက် သိပ်ဖြစ်ချင်တဲ့ ကျွန်မရဲ့ အိပ်မက်တွေဟာ စက်မှုတက္ကသိုလ်မှာ ၆နှစ် လောက် Day သွားတက်ဖို့ မပြောနဲ့ ။ GTI ဘက်တောင် ခြေဦးမလှည့်နိုင်ခဲ့။ မိသားစုရဲ့အကြောင်း A-to-Z သိတဲ့ သမီးအကြီးဆုံး ကျွန်မ ဘာမှမပြောခဲ့ပါ။ နောက်ဆုံး ကိုယ်ဝါသနာပါဆဲဖြစ်တဲ့ အင်္ဂလိပ်စာ အဓိကပဲ ယူမယ်လို့ အိမ်ကို ပြောလိုက်တယ်။ အင်္ဂလိပ်စာ ရမှတ် ၇၀ ကျော်မှ English Major လျှောက်ခွင့်ရှိတဲ့အချိန်မှာ ကျွန်မ ထပ်ကံဆိုးတာက အဲ့ဒီတုံးက E.Major မှာ Distance မရှိပါ တဲ့။

ကျွန်မ ဘာတတ်နိုင်ခဲ့လို့လဲ။ ဖြစ်ချင်တာတွေဖြစ်မလာတိုင်းသာ အရှုံးပေးလိုက်ကြကြေးဆိုရင် ဒီနေ့လိုအနေအထားမျိုး ကျွန်မရောက်ခဲ့ မယ်မထင်ပါ။

နောက်ဆုံးတော့ သင်လေချာလေမေဂျာနဲ့ပဲ ကျွန်မကျောင်းပြီးသွားပါတယ်။ အဆိုးထဲက အကောင်း၊ အရှုံးတွေထဲက အမြတ်က ကျွန်မရဲ့ ဆယ်တန်းရမှတ်တွေကြောင့်ပဲလား။ အမှတ်ကောင်းပြီး လိုင်းကောင်းရခဲ့ရဲ့သားနဲ့ တခွန်းမှ အကောင်းအဆိုးမငြီးငြူပဲ အလုပ်တဖက်နဲ့ Distance တက်ပြီး မြန်မြန်ကျောင်းပြီးအောင်လဲကြိုးစား၊ တဖက်တလမ်းကနေ အိမ်ကိုလဲ တတ်နိုင်သမျှပြန်ထောက်ပံ့ခဲ့လို့လား။

သေသေချာချာတော့ မသိပေမဲ့ အိမ်ကထွက်သွားတော့မယ်ဆိုတဲ့ အဖေဟာလဲ အခုအချိန်ထိ တခါတလေ မီးဖိုချောင်ထဲမှာ အိုးသူကြီး ၀င်လုပ်ဆဲ၊ တခါတလေ အလုပ်မှာ အချိန်ပိုဆင်းပြီး အပြန်နောက်ကျတဲ့ သမီးကို ကြိုဖို့ လမ်းထိပ်မှာ ထွက်စောင့်ဆဲ။

ကျောင်းပြီးသွားတော့ နိုင်ငံခြားကုမ္ပဏီတစ်ခုမှာ နေရာကောင်းကောင်းတစ်ခုကို ထိုက်သင့်တဲ့ လစာတစ်ခုနဲ့ အလုပ်လုပ်နေပြီဖြစ်တဲ့ ကျွန်မက အမေ့ကို အလုပ်နားခိုင်းတော့ အလုပ်မလုပ်ရမနေနိုင် အမေကလဲ အိမ်မှာ ကလေးဘုစုခရုတွေ စာသင်ပေးဆဲ။

အခုအချိန်ထိ Singapore မှာ ရောက်နေတဲ့ သူ့သမီးပို့တဲ့ ပိုက်ဆံတွေကို မစားရက် မသောက်ရက်နဲ့ ဒိုင်ခံစုတဲ့အဖေကလဲ ရပ်ကွက်ထဲမှာ ကျွန်မအကြောင်းတွေ လည်ကြွားဆဲ။

ကိုယ်ဝန်ကြီးနဲ့ ညီမကလဲ သူ့ကိုယ်သူတောင် ဂရုမစိုက်ပဲ “နင် ကျန်းမာရေးဂရုစိုက်နော်၊ အဆာမခံနဲ့နော်” လို့ MC’Donald နဲ့ KFC မှာ Burger ပြေးပြေးစားတတ်တဲ့ ကျွန်မအကြောင်းမသိပဲ ဖုံးဆက်တိုင်းမှာဆဲ ….

by ...DecemberCinderella